Malampusong napahigayon ang Send-Off Ceremony for the Midterm National and Local Election 2025 Deployment kagahapong adlawa Mayo 05, 2025 sa may alas 2:00 ang takna sa hapon, diin kini didto gipahigayon sa Camp Lt. Deogracias G. Hamac, sa Barangay Sicayab ning Dakbayan sa Dipolog.
Gisugdan ang nasangpit nga aktibidad, pinaagi sa opening prayer nga gipangunahan ni Ustadz Hakim A, Adjuran (IMAM) ug ni Msgr. Edgar M. Agura, og gisunod dayon niini ang welcome remarks pinaagi ni Pltcol. Charisse B. Yabo (DPDA).
Ang naasoy nga programa gipangunahan sa Provincial Director sa Zamboanga Del Norte Police Provincial Office (ZNPPO) PCOL. Rainier P. Diaz ug gitambungan usab kini nila ni FSUPT. Richard C. Timosa RN, JD, DSC Provincial Fire Marshall, ATTY. Roberto V. Dela PeÑa, LTJG. Juan Carlos Escamilla sa Philippine Coast Guard, ug ni MAJ. Neolio S. Bricole Jr sa 97th IB sa Philippine Army.
Sa pahayag nga giluwatan ni PCOL. Rainier P. Diaz, iyang awhagan ang mga nagkadaiyang mga uniform personnel nga ilang singkamotan nga mapatuman ang kahapsay ug kalinaw sa tibuok Probinsiya sa Zamboanga Del Norte, panahon sa piniliay.
Sugod ning maong adlaw Mayo 06,2025 hugtanon nang ipatuman sa mga naka-assign nga mga force multiplayers sa matag tulunghaan nga pahigayonan sa election karong umalabot adlaw’ng lunes Mayo 12 ning kasamtangang tuig, diin ilang singkamotan nga maampingan ug maprotektahan ang mga Voter’s Counting Machine (VCM) nga gamiton sa Midterm National And Local Election 2025.(Angelica T. Obina)
Source: Zamboanga del Norte Provincial Information Center(PIC)- Julius Esmade