Kapin sa 3,000 ka campus journalists gikan sa nagkadaiyang eskwelahan sa Zamboanga Peninsula ang nagtigom atol sa Regional Schools Press Conference 2026 (RSPC) nga opisyal nga giablihan sa lungsod sa Sindangan, kaniadtong Marso 5, 2026.
Ang lima ka adlaw nga kalihokan nga nagsugod kaniadtong Marso 5 og hangtod karong umaabot Marso 9 nagtigom sa mga estudyante, campus paper advisers, ug mga opisyal sa edukasyon gikan sa lain-laing Schools Division sa rehiyon aron magkompetensya ug magpalambo sa ilang kahibalo sa journalism.
Sumala sa mga tigpasiugda, ang maong kalihokan usa sa pinakadakong pagtigom sa mga batan-ong manunulat ug broadcasters sa rehiyon, diin gipasundayag sa mga partisipante ang ilang kahanas sa lain-laing larangan sa campus journalism.
Sa mensahe ni Gov. Darel Dexter T. Uy, gibutyag niini nga dako ang papel sa campus journalism sa paghulma sa mga batan-ong lider ug responsableng tigpahibalo sa katilingban. Gidasig usab niya ang mga estudyante nga magpabiling matinud-anon sa kamatuoran ilabi na karon nga paspas ang pagkatag sa impormasyon pinaagi sa teknolohiya.
Apil sa mga Schools Division nga mitambong ang Department of Education divisions sa Dapitan City, Dipolog City, Isabela City, Pagadian City, Zamboanga del Norte, Zamboanga del Sur, Zamboanga Sibugay, Zamboanga City ug Sulu.
Kini nga Regional Schools Press Conference usa ka importante nga kompetisyon sa campus journalism diin naglumba ang mga estudyante sa mga kategoriya sama sa news writing, editorial writing, broadcasting, photojournalism, editorial cartooning ug digital journalism. Ang mga mananaog sa maong kompetisyon maoy magrepresentar sa rehiyon sa umaabot nga National Schools Press Conference.(IKEN B. GULLEM)
Source: Zamboanga del Norte Provincial News Network