Gisugdan sa Munisipyo sa Rizal, Zamboanga del Norte ang digitalization sa lokal nga panggamhanan pinaagi sa pormal nga paglunsad sa electronic Local Government Unit (eLGU) system, usa ka ICT-enabled platform nga nagtinguha sa digital-first economy ug pagpalig-on sa transparency sa gobyerno.
Gihatagan usab ug pasidungog ang Rizal pinaagi sa Digital Governance Vanguard Award isip pag-ila sa malampuson nga paglunsad ug implementasyon sa eGovPH – eLGU System. Ang award nagpasabot sa ilang komitment sa digital transformation ug pagpaayo sa serbisyo publiko pinaagi sa teknolohiya.
Ang pormal nga paglunsad gipangulohan ni Mayor Marissa Manigsaca, kauban si Regional Director Cheryl C. Ortega, atol sa 2025 Gawad sa DICT IX BASULTA sa Paglulunsad segment niadtong Huwebes, Disyembre 11. Ang kalihukan nagtumong sa pagpakita sa kapasidad sa lokal nga panggamhanan sa modernisasyon ug pagpanguna sa digital governance.
Pinaagi sa eLGU system, gilauman nga mapadali ang proseso sa mga transaksyon sa lungsoranon, mapalambo ang monitoring sa serbisyo publiko, ug masiguro ang mas hayag ug transparent nga panggamhanan. (IKEN B. GULLEM)
Source: DICT IX BASULTA