Gipasiugda ang responsableng pagka-amahan atol sa ika-upat nga Municipal ERPAT Day 2026 nga gipahigayon niadtong nilabay nga adlaw sa PCCCSC Gymnasium sa Lungsod sa Rizal uban sa temang “Responsible Fatherhood: Building Strong Families, Protecting Children, and Promoting Violence-Free Homes.”
Gipasiugda ni Mayor Marissa Manigsaca, nga maoy keynote speaker sa kalihokan, ang mahinungdanong papel sa mga amahan isip responsableng lider, tigsuporta, tigpanalipod ug maayong ehemplo sa sulod sa pamilya. Matud pa niya, ang lig-on nga pamilya maoy pundasyon sa malinawon, mauswagon ug lig-on nga komunidad.
Gipasidunggan usab sa maong selebrasyon ang mga miyembro sa ERPAT ug mga amahan tungod sa ilang dakong kontribusyon sa pagpalambo sa kaayohan sa pamilya, pagpanalipod sa kabataan, pagpalig-on sa gender sensitivity ug pagpauswag sa komunidad.
Gipadayag sa lokal nga panggamhanan ug sa mga kaabag nga ahensya ang ilang padayon nga paningkamot sa paglig-on sa mga mithi sa pamilya ug paghimo og luwas ug maampingong palibot alang sa matag bata pinaagi sa responsableng pagka-amahan.(JENIFFER JR. DELICA)
Source: Municipality of Rizal