Mokabat sa 213 ka Persons with Disabilities (PWDs) gikan sa nagkalain-laing lungsod ug siyudad sa Zamboanga del Norte ang naghiusa sa Culmination Program sa 48th National Disability Rights Week nga gipahigayon sa Zamboanga del Norte Convention and Sports Center sa Estaka, Dipolog City.
Gipangunahan sa Provincial Government of Zamboanga del Norte pinaagi sa Provincial Social Welfare and Development Office (PSWDO) ang maong kalihokan nga may temang “Rights First, Legislation Forward: Strategic Action for Equal Participation and Inclusive Development,” nga nagtumong sa pagpalig-on sa panalipod sa katungod sa mga PWD ug pagpasiugda sa inklusibong kalamboan.
Matod ni Acting PSWDO Hannah Lou G. Mandantes, ang selebrasyon usa ka pag-ila sa kusog, dignidad, ug katungod sa matag PWD. Giawhag usab niya ang tanan sa pagtinabangay aron matukod ang usa ka komunidad nga mas accessible, inclusive, ug adunay pagtahod sa tanan.
Samtang, gipasiugda ni 2nd District Board Member Michael “Jojo” Documento ang padayon nga suporta sa Sangguniang Panlalawigan pinaagi sa mga ordinansa ug sa plano sa pagtukod sa Provincial PWD Office aron mapalambo pa ang mga serbisyo alang sa sektor.
Sa mensahe nga gipahat ni 1st District Board Member Atty. Dario M. Mandantes alang kang Governor Darel Dexter T. Uy, gipasabot nga nagpadayon ang probinsyal nga panggamhanan sa pagpatuman og mga programa nga nagpalambo sa panglawas, panginabuhian, ug kaayohan sa mga PWD.
Mipaambit usab si keynote speaker Darry P. Caybot Jr., tag-iya sa Project Walk, sa iyang personal nga kasinatian human sa usa ka aksidente nga nagbag-o sa iyang kinabuhi. Iyang gidasig ang mga partisipante sa pagtan-aw sa mga hagit isip inspirasyon ug pagpahinumdom nga ang mga PWD adunay bililhong papel sa pagpalambo sa ilang komunidad.
Lakip usab sa kalihokan ang oath-taking sa bag-ong mga opisyales sa Zamboanga del Norte Persons with Disabilities Federation (ZNPWDF) ug ang PWD Magpasikat 2026 Talent Showcase, diin gipasundayag ang talento ug abilidad sa mga PWD.(IKEN B. GULLEM)
Source: Zamboanga del Norte Provincial News Network