‘Bisan dili nutrition month, kinahanglan magalihok, magtambayayong ang mga hingtungdan ahensya aron matuki ug mahatagan kasulbaran ang malnutrisyon sa probinsya sa Zamboanga del Norte.”
Kini ang gipasibaw nga mensahe ni Provincial Social Welfare and Development Officer Dr. Jose G. Mante atul sa 2nd Joint Quarterly Meeting with Municipal Nutrition Action Officer (MNAOs) and Barangay Nutrition Scholars (BNS) Federation Presidents of ZaNorte sa Room 3 Conference Hall Capitol Building Estaka ning dakbayan sa Dipolog.
Si Dr. Mante nagahangyo sa katawhan nga ang mga naglihok kalambigit sa nutrisyon, magtambayayong aron masumpo ang malnutrisyon ning lalawigan nga naga-una nga problema.
Base sa taho sa kalungsuran lakip ang duruha ka dakbayan sa Dipolog ug Dapitan, gisugyot sa aktibong PSWD officer nga adunay pagatukoron nga nutrition office sa matag barangay aron ang pundo alang sa problema sa malnutrisyon dali ra kining magamit ug mahimoan gilayon sa aksyon ang mga yangungo ug problema.
Gidasig ni Dr. Mante ang mga kalambigit sa nutrisyon nga mga kawani nga dili lamang sa nutrition month celebration mohimo’g aksyon kon aktibo, lakip na sa kinatibuk-an nga mga panahon.
Gikahibaloan nga ang maong panagtigum, subay sa nasudnong pagsaulog sa 49th Nutrition Month nga madugangan ang kahibalo sa tukma nga healthy diet ug lifestyle sa matag indibidwal.
Sa nasayran nga adunay 10 ka Learning Hub for Enhanced and Revitalized Nutrition Project sa National Nutrition Council, ang pagatukoron sa nagkadaiyang dapit palibot ning lalawigan, aron mapalapdan ang kahibalo sa nutrition program management ug inanay nga mokunhod ang malnutrisyon.
(Source: Provincial Information Center ZaNorte Facebook page)