Sugod na nga mipahigayon og “Profiling ug Inventory” alang sa mga apektadong Rice Retailers ug Dealers dinhi sa dakbayan kalabot na sa pagpatuman sa Executive Order No. 39 isip kamandoan sa atong nasudnong kagamhanan, nga sugod mi-epekto niadtong nakalabay nga Septembre 5, 2023.
Ang nasangpit nga profiling ug inventory gihimo kagahapon sa buntag, Septembre 7, 2023, ilawom sa pagpanguna sa Department of Trade and Industry pinaagi ni Ms. Maila Dinolan uban sa mga personahe niini ug sa personahe gikan sa lokal nga buhatan sa City Agriculture.
Sigun sa dugang nasayran nga kining maong kalihokan gihimo ilawom sa pagdumala sa DTI, maoy mandato sa atong nasudnong kagamhanan, sa katuyu-an nga malista kadtong mga apektadong negosyante sa bugas, nunot sa pagpatuman sa EO 39, alang sa paglugway sa posibleng ayuda, alang sa apektadong mga lehitimong rice dealers ug retailers, human mandatoryong gipatuman ang 41 pesos nga presyo alang sa “regular milled” rice, samtang 45 pesos usab alang sa “well-milled” rice.
Alayon ning inventory ug profiling karon sa DTI, kini ang dugang mi-awhag ngadto sa apektadong negosyante sa bugas nga wala nila kahimo-i sa pag-inventaryo, sa pagbisita lang dinha sa atong probinsiyal nga buhatan sa Department of Trade and Industry alang sa maong katuyu-an.
Kalabot niini, dugang gi-awhag sa DTI, nga sa ilang pag-adto unya sa maong buhatan, ilang paga-dalhon ang mga importanteng papeles sama sa 1) Business Permit, 2) resibo sa ilang pagkompra sa bugas gikan sa supplier niini ug uban pang mga papeles nga nagtuo silang gikinahanglan alang sa profiling ug inventory.
(Source: Dipolog City Government Facebook page)