Nahuman na ang unang hugna o Phase 1 sa embankment project sa Sirawai National High School grounds sa Sirawai, Zamboanga del Norte, aron matubag ang dugay nang problema sa paglanab, pagbaha, ug pagpundo sa tubig sulod sa eskwelahan panahon sa high tide o taob sa dagat.
Gisugdan ang proyekto human mohangyo si Sirawai National High School Principal I Bartolome D. Oborda Jr. kang Mayor Jazz Janihim sa Local Government Unit sa Sirawai. Gidangat dayon ni Mayor Janihim ang hangyo ngadto kang Governor Darel Dexter T. Uy pinaagi sa Office of the Provincial Engineer District III-C ubos sa pagdumala ni Area Engineer Dennis de Guzman.
Sumala kang Engr. De Guzman, ang nahimutangan sa eskwelahan usa ka swamp area nga gitambakan kaniadto aron mahimong tukoran sa school. Apan adunay mga bahin sa grounds nga wala pa hingpit matambaki ug dili patag, hinungdan sa pagpundo sa tubig ilabina panahon sa high tide ug ulan. Human sa Phase 1, mas nahapsay na ang pipila ka bahin sa school grounds, samtang gihikay na ang Phase 2 aron makompleto ang embankment project.
Gilakip usab sa maong buluhaton ang pagtambak sa karaang oval sa Sirawai Proper nga gigamit sa komunidad alang sa nagkalain-laing kalihokan ug nagsilbing praying grounds sa Muslim community atol sa Eid’l Fitr niadtong Marso 21, 2026. Ang Provincial Government of Zamboanga del Norte ang mitubag sa gasto sa pagtambak og yuta, paggamit sa krudo, makinarya, ekipo, ug uban pang engineering works isip suporta sa edukasyon ug mga komunidad sa probinsya.(JENIFFER JR. DELICA)
Source: Zamboanga del Norte Provincial News Network