Dipolog: Probinsya nanghatag hinabang sa dul-an 9 mil ka pamilya nga apektado sa pagbaha

0
1
Ang Kagamhanang-Probinsyal sa Zamboanga del Norte pinaagi sa Provincial Disaster Risk Reduction and Management Office (PDRRMO) ug Provincial Social Welfare and Development Office(PSWDO) padayon karong nanghatag ug hinabang sa 8,926 ka mga pamilya nga naapektahan sa pagbaha niadtong nakalabayng pasko.

Sa report sa PDRRMO, 8 ka mga lungsod sa Zamboanga del Norte ang  nakaangkon ug dakong kadaot sa nakalabayng pagbaha. Sa 8,926 ka pamilyang apektado sa pagbaha, 3,240 ka pamilya ang taga-dakbayan sa Dipolog, 3,409 sa dakbayan sa Dapitan, 1,467 sa Polanco, 519 sa Katipunan, 102 sa Roxas, 44 sa Piñan, 37 sa Labason ug 8 ka pamilya sa Liloy.

Sumala pa sa PSWDO, padayon karon silang nag-empake sa mga relief goods para sa mga apektadong pamilya, ug ang una pa lang nahatagan ug hinabang mao ang mga apektadong residente sa lungsod sa Polanco.

Patin-aw pa sa PSWDO nga ang ilang giandam nga relief goods, kuhaon mismo sa representante sa mga apektadong lungsod gikan sa ilang bodega para usab ipanghatag sa mga biktima sa baha sa ilang lugar.

Mahinumdoman, nga human sa maong pagbaha, gimando gilayon ni Governor Rosalina “Nanay Nene” Jalosjos ang pagsubay sa kadaot nga gidulot niini sa mga Zanortehanon ug pagtunol sa tukmang hinabang sa mga biktima sa nasangpit nga pagbaha.

(Source: Provincial Information Center Zanorte Facebook Page)

Leave a Reply