Gipakanaog ni Mayor Darel Dexter T. Uy Nobyembre 16 ning tuiga, ang Orden Ehekutibo No.35 serye 2023, nga nag-deklara sa Nobyembre 19 hangtod 25 isip “Press Week” dinhi sa dakbayan sa Dipolog.
Ang nasangpit nga Orden Ehekutibo ang gipirmahan ni Mayor Uy isip pag-ila sa prensa alang sa tanang natampo niini sa katilingban ilabina dinha sa pagsabwag sa mga importanteng impormasyon nga gikinahanglang masayran sa tanan.
Ang pagsaulog sa Press Week gipasikad usab sa Presidential Proclamation No.191, series of 1964 ug Presidential Proclamation No. 8, series of 1966 alang sa obserbasyon ug selebrasyon sa National Press Week sa matag tuig.
Samtang gisaysay usab sa Sec. 4, Article III sa 1987 Constitution nga nag-ingon “No law shall be passed abridging the freedom of speech, of expression, or of the press, or the right of the people peaceably to assemble and petition the government for redress of grievances”.
Nasayran nga ang Zamboanga del Norte Press Club Inc. ang hugtanon usab nga mipaluyo, isip pagyukbo ug pagtahod, niining nasangpit nga kasaulogan.
(Source: Dipolog City Government Facebook page)