Nagpalig-on sa pagmonitor ug implementasyon sa mga proyekto sa kabanikanhan ang Provincial Project Management and Implementing Unit (PPMIU) atol sa ilang tigum kagahapong adlawa Mayo 11, sa Provincial Governor’s Conference Room ubos sa pagpanguna ni OIC-Office of the Provincial Governor Charmie A. Yu.
Gihisgutan sa maong miting ang kasamtangang kahimtang ug progreso sa mga proyekto ilalom sa Philippine Rural Development Project (PRDP), isip kabahin sa pagpangandam alang sa umaabot nga evaluation meeting uban sa National ug Regional PRDP Team.
Mipresentar ang matag component heads sa updates sa mga programa nga nagtumong sa pagpalambo sa rural infrastructure, pagpalig-on sa produksyon sa agrikultura, ug paghatag dugang panginabuhian sa mga komunidad sa probinsya.
Matud sa PPMIU, importante ang maong pagmonitor aron masiguro nga hapsay ug epektibo ang implementasyon sa mga proyekto nga pondohan sa PRDP ug aron mapadali ang pag-abot sa benepisyo ngadto sa mga mag-uuma ug katawhan sa kabanikanhan.
Kabahin usab kini sa padayong paningkamot sa probinsyal nga gobyerno sa pagduso sa inclusive rural development ug lig-on nga pagtubo sa ekonomiya sa probinsya.(IKEN B. GULLEM)
Source: Zamboanga del Norte Provincial News Network