Giluwatan ni Dipolog City Mayor Roberto Y. Uy ang Executive Order No. 31 nga nagtugot sa temporaryong pagsaka sa plite sa mga motorcab sa siyudad isip tubag sa padayon nga pagsaka sa presyo sa produktong petrolyo.
Misaka gikan sa P15 ngadto sa P20 ang minimum fare sa city proper human madugangan og P5 ang naandang plitehan, subay sa Executive Order nga pinetsahan og Hunyo 19, 2026.
Sumala sa lokal nga panggamhanan, ang maong fare adjustment gihimo aron matabangan ang mga motorcab operators ug drivers nga naapektuhan sa taas nga gasto sa operasyon tungod sa pagsaka sa presyo sa lana sa lokal ug internasyonal nga merkado.
Temporaryo lamang ang maong fare increase ug magpabiling epektibo sulod sa usa ka tuig gawas kon usbon, lugwayan o rebokahon pinaagi sa laing executive order o aksiyon sa Sangguniang Panlungsod. Gikatakda usab sa siyudad ang pagrepaso sa maong adjustment kon mokunhod na ang presyo sa lana o adunay bag-ong kahimtang nga nagkinahanglan sa pagbalik sa naandang plitehan.(JENIFFER JR. DELICA)
Source: Dipolog City Government