Mikortesiya kang Governor Darel Dexter T. Uy ang bag-ong Provincial Link sa Pantawid Pamilyang Pilipino Program o 4Ps nga si Evalinda A. Jimeno sa Kapitolyo sa Zamboanga del Norte niadtong Hunyo 22.
Kauban ni Jimeno si 4Ps Provincial Grievance Officer Atty. Angelica L. Delacerna diin ilang gihisgutan ang pagpalig-on sa panagtambayayong tali sa Department of Social Welfare and Development ug sa Probinsyal nga Panggamhanan alang sa mas epektibong paghatod sa mga programa ug serbisyo sa mga benepisyaryo sa 4Ps.
Atol sa panagtagbo, gipasiugda usab ni Gov. Uy ang kamahinungdanon sa pag-atiman sa kinaiyahan pinaagi sa usa ka tree-planting initiative nga nagtumong sa pagtanom og 60,000 ka kahoy matag tuig sa probinsya.
Sumala sa gobernador, makatabang ang maong programa sa pagpanalipod sa kalikupan ug sa pagmintinar sa himsog nga palibot alang sa umaabot nga mga henerasyon sa Zamboanga del Norte.(JENIFFER JR. DELICA)
Source: Zamboanga del Norte Provincial News Network