Gipahigayon sa Dipolog City karong buntaga, Oktubre 20, 2025, ang pagpirma sa duha ka Memorandum of Agreement tali sa Sergio Osmeña Sr. Infirmary Facility o SOSIF ug Zamboanga del Norte Medical Center o ZNMC aron mapalig-on ang akses sa healthcare ug mas mapaayo ang sistema sa ambulance referral sa mga pasyente sa Sergio Osmeña ug silingang mga lugar.
Gipirmahan kini ni Dr. Arjay A. Lao, OIC-Chief of Hospital sa SOSIF, ug ni Dr. Romelo M. Vergara, Chief of Hospital sa ZNMC, uban sa mga saksi nga sila Nurse Rommel C. Jamolod ug Nurse Marnie S. Omamalin. Ang maong kasabutan gipasiugdahan aron mas paspas ang pag-refer sa mga pasyente ngadto sa ZNMC alang sa mga serbisyo nga wala sa lokal nga infirmary sama sa CT scan, dialysis, ug operasyon.
Gipasalamatan ni Mayor Glen Yu ang maong panag-uban nga nagtinguha sa mas epektibong pagserbisyo sa mga pasyente, samtang gipadayag ni Dr. Lao ang pasalig sa SOSIF ug ZNMC sa paghatag og kalidad nga serbisyo medikal bisan sa kabaryuhan. Ang panaghiusa nag-uban sa panlantaw ni Gobernador Darel Dexter Uy nga mas mapalapad ang kalidad nga serbisyo pangkalusugan sa tibuok probinsya.(Jeniffer Jr. Delica)
Source/Photo Courtesy: Zamboanga del Norte Provincial News Network