Gipusil-patay ang usa ka lalaki nga magbabaligya og isda sa Barangay San Jose, Baliguian, Zamboanga del Norte pasado alas 4:20 sa hapon, Oktubre 17, 2025. Ang biktima residente sa Barangay S. Arabi, Siocon, ug namatay diha-diha tungod sa daghang samad sa ulo, liog, ug likod.
Sumala sa imbestigasyon, ang wala mailhing lalaki nga nagsul-ob og itom nga kalo, jacket, ug face mask, ug nagsakay sa itom nga Skygo nga motorsiklo, misulong sa biktima ug mipusil dayon niini sa karsada sa maong barangay. Human sa krimen, mikalagiw kini padulong sa direksyon sa Siocon.
Dayon mitubag ang kapulisan sa Baliguian ug naglunsad og hot pursuit operation aron maila ug madakpan ang suspetsado. Padayon ang imbestigasyon sa Baliguian Municipal Police Station aron matino ang tinuod nga motibo sa pagpamusil.(Jeniffer Jr. Delica)