Malampuson nga gipahigayon sa Philippine Health Insurance Corporation (PhilHealth) pinaagi sa programang PULSE o Promoting UHC thru Linkages, Synergy and Engagement ang ikatulong Handog Pasasalamat uban ang mga stakeholders niadtong Martes, Septiyembre 16, 2025, didto sa Ariana Hotel, ning dakbayan sa Dipolog.
Ang maong panagtigum gitambongan sa nagkalain-laing mga bisita ug opisyal sa sektor sa panglawas, lakip na si Regional Vice President sa PhilHealth Regional Office IX, RD Paolo Johann C. Perez; si Assistant Provincial Health Officer, Dr. Benson Panaguiton, nga mitambong sa ngalan ni Zamboanga del Norte Governor Darel Dexter T. Uy; ug si Dr. Michael G. Te, CCAH-Hospital Administrator Designate, nga mitambong sa ngalan ni Dipolog City Mayor Roberto Y. Uy.
Sa ilang tagsa-tagsa ka mensahe, gihatagan gibug- aton nila RD Perez, Dr. Panaguiton ug Dr. Te ang papel sa panaghiusa ug pakigtambayayong aron mas mapalig-on ang Universal Health Care (UHC). Gipasabot nila nga pinaagi sa lig-on nga linkages ug kolaborasyon, mas mapalapdan ang serbisyo sa panglawas alang sa katawhan.
Tumong sa Handog Pasasalamat ang pagpasidungog sa mga kaabag nga organisasyon ug indibidwal nga madasigon sa misyon sa PhilHealth nga maprotektahan ang kahimsog sa mga Pilipino pinaagi sa hapsay nga serbisyo ug paniguro sa panglawas.
Kini nga inisyatiba nagpakita sa padayon nga paningkamot sa PhilHealth ug sa tanang stakeholders aron makab-ot ang handum nga kalambuan sa panglawas alang sa tanan.(Jumalisa Papa)
Source: Dipolog City Government