Gipaduol sa Provincial Government of Zamboanga del Norte (PGZN) ang libre nga serbisyong panglawas ug uban pang serbisyo sa gobyerno ngadto sa mga residente sa Liloy isip kabahin sa pagsaulog sa ika-75 nga Founding Anniversary sa lungsod.
Gipahigayon niadtong milabay nga adlaw sa Liloy Commercial Building sa Barangay Baybay ang Kuyog Ta Medikal ug Serbisyo Caravan nga gipadala ni Governor Darel Dexter T. Uy.
Gipangulohan ni OIC-Provincial Health Officer Dr. Benson Panaguiton, uban nila Dr. Jane Jaug, Dr. Mirabelle Diaz ug mga health worker gikan sa Office of the Provincial Health Officer (OPHO), ang medical outreach nga nagtanyag og libre nga medical consultation ug check-up, tambal ug bitamina, dental services, X-ray, ug diagnostic laboratory services.
Mitambong usab ang Office of the Provincial Veterinarian nga naghatag og libre nga anti-rabies vaccination, bitamina, ug deworming alang sa mga binuhi.
Dugang sa health services, naghatag usab og seedlings ang Office of the Provincial Agriculture, samtang ang Provincial Social Welfare and Development Office ug Provincial Nutrition Office naghatag og oat meal alang sa mga pasyente.
Nakig-alayon usab ang Rural Health Unit sa Liloy pinaagi sa paghatag og libreng tambal, bitamina, reading glasses, ug serbisyo ubos sa YAKAP Program.
Misalmot usab sa medical mission ang mga Municipal Health Officer gikan sa Godod, Tampilisan, Labason, ug Liloy, lakip si Dr. Rosalyn D. Luis, Doctor to the Barrio sa Liloy.
Pinaagi sa panagtinabangay sa PGZN, mga lokal nga opisyal, health workers, ug nagkalain-laing provincial offices, mas daghang residente ang nakadawat og libre nga serbisyo ug tabang atol sa pagsaulog sa anibersaryo sa lungsod.
Mipadayag og pasalamat si Liloy Mayor Roberto “Junjun” Uy ug ang Sangguniang Bayan sa Liloy sa PGZN, Office of the Provincial Health Officer, ug sa tanang health workers, ahensya, ug indibidwal nga mitabang sa pagpahigayon sa caravan.(IKEN B. GULLEM)
Source: Zamboanga del Norte Provincial News Network