DIPOLOG CITY — Gipalig-on sa Provincial Government of Zamboanga del Norte ang gender-responsive governance pinaagi sa pagpahigayon og duha ka adlaw nga workshop sa pag-andam sa Gender and Development (GAD) Plan ug Budget, lakip ang GAD Accomplishment Report ug paggamit sa Harmonized GAD Guidelines.
Ang kalihokan nagtumong sa pagpaayo sa kapasidad sa mga opisina sa probinsya ug lokal nga lebel aron masiguro nga ang ilang mga plano, programa, ug badyet sensitibo sa gender ug mosunod sa kasamtangang polisiya sa nasud.
Sa maong training, gihatagan og giya ang mga partisipante sa hustong pagplano, pag-implementar, ug pagreport sa GAD programs, lakip ang paggamit sa standardized tools ug digital reporting system aron mas mapaspas ug mas tukma ang pagsumite sa mga report.
Pinaagi niini, padayon nga gipalig-on sa probinsya ang maayong pangagamhanan pinaagi sa pagsiguro nga ang mga serbisyo ug programa motubag sa panginahanglan sa tanang sektor, ilabi na sa kababayen-an.(JENIFFER JR. DELICA)
Source: Zamboanga del Norte Provincial News Network