Nag-anam og kainit ang gabii sa Dipolog City atol sa “P’gsalabuk Urban Fusion: Rise of Legacy Dance Competition” nga gipahigayon niadtong Mayo 20, 2026 sa Dipolog Twin Commercial Building ubos sa kahayag sa Dipolog Boulevard.
Gitigoman sa maong kompetisyon ang nagkalain-laing dance groups ug supporters gikan sa nagkadaiyang barangay sa siyudad, diin gipakita sa mga kalahok ang ilang talento pinaagi sa modernong sayaw nga gisagolan og cultural influences ug urban choreography.
Nakabihag sa mga nanan-aw ang sunod-sunod nga high-energy performances, lakip ang hip-hop ug contemporary dance numbers nga nagpakita sa disiplina, dedikasyon ug abilidad sa mga kabatan-onan sa Dipolog sa natad sa performing arts.
Gituohang nakapalig-on pa ang maong kalihukan sa reputasyon sa Dipolog isip sentro sa youth empowerment, cultural appreciation ug dagkong community events nga naghatag og kalingawan ug inspirasyon sa katawhan.(JENIFFER JR. DELICA)
Source: Dipolog City Government