Aron mapalig-on ang abilidad, disiplina, ug kahimtang sa pagpangandam sa operasyon sa mga personahe, ang Zamboanga del Norte Provincial Mobile Force Company (ZNPMFC) ubos sa liderato ni PLTCOL Ryan Jay R. Capurcos, Force Commander, nagpahigayon ug pagbansay kabahin sa rifle exercise didto sa Purok Daisy, Brgy. Sicayab, Dakbayan sa Dipolog.
Niining kalihokan, mipartisipar ang tanang mga pulis sa ZNPMFC nga naglakip sa mga miyembro sa 1st ug 2nd Maneuver Platoons, uban pa nga mga support personnel, nga mihatag sa ilang aktibong partisipasyon sa pagbansay.
Ang maong rifle exercise naglakip sa pagsanay sa wastong paghawid ug paggamit sa armas, target firing, ug tactical movement drills, nga nagtumong sa pagpalig-on sa marksmanship ug operational readiness sa matag personahe.
Matod pa ni PLTCOL Capurcos, ang padayon nga pagbansay sama niini nagpasabot sa dedikasyon sa yunit sa pagmantener sa kalinaw ug seguridad sa probinsya, ug sa pag-andam sa mga pulis nga mahimong mas epektibo ug responsable sa ilang katungdanan.
Gilauman nga pinaagi sa maong kalihokan, mas mapalambo ang kahanas, kooperasyon, ug disiplina sa mga personahe sa ZNPMFC aron magpabilin silang andam motubag sa bisan unsang hulga o emerhensiya sa Zamboanga del Norte.(IKEN GULLEM)