Ang Philippine Charity Sweepstakes Office (PCSO) pinaagi ni OIC-Branch Head Walter C. Serrano, nitunol og tseke ngadto kang Provincial Administrator Atty. Dug Christoper B. Mah ug Provincial Treasurer Jessie A. Concepcion, nga mokabat sa Php697,928.00 atol sa iyang pag-kortesiya sa buhatan sa administrador, Desyembre 22 ning tuig sa 2/f Capitol Building, Dipolog City.
Matod ni OIC-Branch Head Serrano, ang nahisgutang shares gikan sa lotto ug localized Small Town Lottery (STL) operation, diin kini maoy abot sa probinsya sulod sa tuig 2022.
Dugang ni Serrano, nga dili makuhaan ang share sa probinsya tungod kay naa usab bahin ang matag munisipyo ug syudad.
Niini, dako ang pagpasalamat ni Governor Rosalina ‘Nanay Nene’ Jalosjos, pinaagi ni Atty. Popoy Mah, sa PCSO sa pamunuan ni OIC-Branch Head Serrano nga personal nipa-abot sa maong shares para sa probinsya sa ZaNorte.
Kahibaloan, ang paghatag sa lotto ug STL shares subay kini sa Executive Order No. 357-A, diin 5% sa 30% Lotto Charity Fund gigahin sa Local Government Units partikular sa mga Lungsod/Municipality, samtang ang 2% gigahin sa mga Probinsya diin gibaligya ang lotto tickets.
(Source: Provincial Information Center Zanorte Facebook page)
