Wala nay kinabuhi ug anaa sulod sa lungon nga nadawat sa pamilyang Zamoras ang lawas ni Honeylith Cabrera Zamoras, usa ka Overseas Filipino Worker (OFW) nga giingong gipusil-patay sa anak sa iyang amo sa Lebanon niadtong Abril 15, 2026.
Adlawng Huwebes, Hunyo 11, nadawat sa pamilya ang patayng lawas ni Honeylith, 31 anyos ug maoy breadwinner sa ilang panimalay nga taga-Olingan, Dipolog City. Nahitabo kini human sa kapin duha ka bulan nga proseso sa repatriation aron mauli ang iyang lawas sa Pilipinas.
Sa pakighinabi sa DXKD-Dipolog, gibutyag sa iyang uyoan nga si Mexico Zamoras nga sulod sa 10 ka tuig nga pagtrabaho ni Honeylith sa gawas sa nasud, karon pa lamang kini nakauli sa ilang panimalay.
Samtang, lisod gihapon dawaton ug masabtan sa iyang amahan nga si Jolito Miones ang nahitabo sa iyang anak. Matud pa niini, bisan wala sila magkita sukad pagkatawo ni Honeylith, nagpadayon gihapon ang ilang komunikasyon sa paglabay sa mga katuigan.
Mipahayag usab og dakong pasalamat ang pamilya ngadto sa Department of Migrant Workers (DMW), Overseas Workers Welfare Administration (OWWA), ug sa mga lider sa probinsyal ug lokal nga panggamhanan tungod sa tabang ug suporta nga ilang nadawat sa panahon sa kasubo ug kalisod.
Sa pagkakaron, wala pa gihapoy klarong impormasyon o opisyal nga detalye nga nadawat sa pamilya kabahin sa eksaktong nahitabo kang Honeylith. Busa, ilang gipadayag ang panawagan nga matuman ang hustisya ug mapanubag ang responsable sa iyang kamatayon.
News and photo by: IKEN B. GULLEM