Gipahigayon ang panagtigum sa Solid Waste Management Board sa Kagamhanang Lokal ning siyudad kagahapon, Hunyo 30, ning tuiga didto sa 2nd Floor, Barangay Hall Miputak, ning dakbayan. Ang maong kalihokan ang gitambongan ni City Mayor Darel Dexter T. Uy, kinsa nangulo sa nasangpit nga panagtigum uban ni City ENRO, Ms. Mercedita C. Guerrero.
Mitambong usab sa maong panatigum ang pipila ka mga punong barangay ug opisyal gikan sa 21 ka barangay sa dakbayan lakip na ang mga nagkalain-laing ahensya sa gobyerno ug mga opisyal gikan sa Kagamhanang Lokal isip miyembro sa Solid Waste Management Board.
Tipik sa gipanghisgutan mao ang mga “updates” mahitungod sa pag-implement sa “City Solid Waste Management Plan” diin gisaysay sa pipila ka mga opisyal sa kabaranggayan sa dakbayan ang ilang tinguha kabahin sa mga Material Recovery Facilities kon MRFs nga anaa sa ilang tagsa-tagsa ka barangay.
Lakip usab sa gituki mao ang sulat nga nadawat sa Kagamhanang Lokal gikan sa DENR – Environmental Management Bureau Region IX kabahin pagsanong sa Section 24 sulod sa Republic Act No. 9003 diin mihatag ang hingtungdan og mga suhestyon alang sa insaktong pag-implement niini sa siyudad sa Dipolog.
Dugang niini, mihatag usab sa ilang mga tinguha ug mulo ang pipila ka mga punong barangay ug “barangay officials” kabahin sa “Garbage Collection” ug “Sanitation” sa ilang tagsa-tagsa ka barangay.
(Source: Dipolog City Government Facebook page)
