Sugdan na ang pagsemento sa 14.124-kilometro nga farm-to-market road (FMR) nga nagkutay sa unom ka barangay sa lungsod sa Siocon nga adunay kantidad nga Php386 milyones, niadtong Setyembre 1, 2025, ubos sa implementasyon sa Department of Agriculture–Philippine Rural Development Project (DA-PRDP).
Sa wala pa ang pormal nga groundbreaking ceremony, ang mga Subanen gikan sa Barangay Tabayo ug D. Riconalla, pinangulohan sa ilang Balian nga si Danilo Davi, nagpahigayon ug ritwal isip pagpananghid sa mga dili makita nga nilalang. Naghimo sila ug halad pinaagi sa pagpatay og unom ka manok, uban pang pagkaon, ug pangase.
Sumala ni Nenita Davi, Indigenous Peoples Mandatory Representative (IPMR) sa tribong Subanen sa Barangay Tabayo, importante ang paghalad aron malikayan ang mga kakulian sa implementasyon sa proyekto, ilabi na sa paggamit sa mga ekipo ug sa kaluwasan sa mga trabahante.
Sa pagsaulog sa kalihokan, nagpaila ang komunidad sa ilang kalipay pinaagi sa pagtukar sa agong ug mga instrumento nga kawayan. Gibutyag sa mga residente nga dugay na nila kining gipangandoy aron makasinati na sila og luwas ug hapsay nga dalan ug malikayan ang taas nga pletehan sa transportasyon.
Gibanabana nga 3,230 ka panimalay ang direktang makabenepisyo gikan sa rehabilitasyon ug concreting sa karsada nga naglangkob sa mga barangay Pisawak, Bulacan, New Libutan, Makiang, D. Riconalla, ug Tabayo. Ang goma ug abaka mao ang nag-unang produkto sa maong lugar.
Si Mayor Cesar Soriano mipasalamat sa World Bank nga mitampo og 80% sa pondo ug sa Gobyerno sa Pilipinas nga mitabang og 10%. Ang MLGU Siocon mitampo usab og 10% aron masiguro ang implementasyon sa proyekto nga nagpasabot nga kini ang pinakadakong proyekto ubos sa DA-PRDP alang sa lungsod sa Siocon.
Samtang si Deputy Project Director Maria Melba B. Wee, nga mirepresentar kang Regional Project Director Marcos C. Aves, Sr., nagpasalamat sa MLGU Siocon sa ilang suporta ug kooperasyon. Gipasidunggan usab niya ang kakugi ug determinasyon sa lokal nga liderato ug sa mga teknikal nga personahe sa pagproseso sa mga dokumento aron maaprobahan ang maong proyekto.(Jumalisa Papa)
Source: DA-PRDP ZAMPEN