Walo ka residente sa siyudad ang nakadawat og cash assistance gikan kang City Mayor Roberto Y. Uy atol sa gipahigayon nga distribusyon sa tabang pinansyal, niadtong Setyembre 2, 2025, sa City Mayor’s Office, ning dakbayan sa Dipolog.
Ang maong ayuda gipang-apod-apod ubos sa Assistance to Individuals in Crisis Situations (AICS) program sa Department of Social Welfare and Development (DSWD), nga gipaabot aron makatabang sa mga indibidwal ug pamilya nga nag-aatubang sa kalisdanan o emerhensiya.
Ang walo ka benepisyaryo naggikan sa 21 ka barangay sa Dipolog City, nga gipaluyohan sa pag-ila ug pagpanghimatuod sa ilang kahimtang sa krisis.
Ang distribusyon sa ayuda nagpamatuod sa padayon nga pagtutok sa lokal nga panggamhanan, kauban ang DSWD, sa paghatag og hinabang ug suporta alang sa mga residente nga nanginahanglan.(Jumalisa Papa)
Source: Dipolog City Government