Han-ay ug andam na ang gikatakdang pagpahigayon sa “ALAY LAKAD 2022” (Walk Activity and Raffle Draw) karong umaabot Oktubre 2, 2022, adlaw’ng Domingo nga manukad dinha sa Dipolog Boulevard padulong ngadto sa Dipolog City Sports Complex.
Kining maong tinuig nga kalihokan ang tuyong gihimo sa Alay Lakad Council, duyog na sa kagamhanang lokal ning dakbayan, kansang tumong mao ang pagkalap sa dugang pondo aron magamit dinha sa pagpalahutay sa mga “Alay Lakad Scholars” nga nagtungha ning kasamtangan.
Ang maong kalihokan ang magsugod sa alas 4:00 sa sayong buntag sa nahisgotang petsa sa unahan ug ang paglakaw ang magsugod sa alas 5:00 sa susamang buntag.
Ang Alay Lakad 2022 ang paga-bolokan sa “Walk Activity, “Search for Mr. and Miss Alay Lakad 2022” ug “Raffle Draw”.
Adunay mga ganti nga gitagana sa mga palarang mananaug, diin ang mahimong makasalmot sa raffle draw mao lamang kadtong mopalit sa raffle tickets sa kantidad nga tag 10 pesos, isip dugang fund-raising.
Ang raffle draw ang nagtanyag sa 3 major cash prizes sama sa First Prize – 30 mil pesos, Second prize – 20 mil pesos ug 10 mil pesos alang sa Third Prize.
Subay ning maong kalamboan, madasigon karong nagpahibalo ang lokal nga buhatan sa City Treasurer ning siyudad, nga ang mga raffle tickets alang niini ang mahimo nang mapalit dinha sa ilang buhatan panahon sa ting-opisina, ug dinha usab sa mga guards nga naka-destino dinha sa entrance sa City Hall panahon sa Holidays sigun sa inpormasyon pinaagi ni Assistant City Treasurer, Hermie Sabando.
Tungod niini, nagdasig karon ang Alay Lakad Council ug ang kagamhanang lokal ning siyudad ngadto sa tanang pribado ug pampublikong mga ahensiya ug buhatan, Barangay Council, mga establismento, mga kahugpungan, NGOs, tulunghaan, Civil Society Organizations, lakip na ang mga indibidwal sa pagsalmot sa Alay Lakad 2022 ug sa pagpalit usab og mga raffle tickets, isip atong pagsuporta ngadto sa maayong katuyu-an niini alang sa atong mga kabataang adunay kaalam apan wala ikasugakod sa pagtungha gumikan sa kawad-on.
(Source: Dipolog City Government Facebook page)