Mokabat sa balor P6.28 Milyones ka pesos nga kantidad sa smuggled nga sigarilyo ang malampusong nakumpiska sa mga personahe sa kapulisan gikan sa usa ka indibidwal atol sa gipahigayon nga boarder Checkpoint operation mga alas 7:02 ang takna sa kabuntagon niadtong Hunyo 19, 2026, border control checkpoint sa Barangay Gatas, Kalawit, Zamboanga del Norte.
Ang maong indibidwal naila nga usa ka 36 anyos nga minyo, lalaki ug residente sa Barangay Zambowood, Zamboanga City kinsa nasapon uban sa mga kontrabando pinaagi sa mga personahe sa 2nd Provincial Mobile Force Company (PMFC) sa Zamboanga del Norte, uban sa koordinasyon sa Kalawit Municipal Police Station ug sa Provincial Intelligence Unit sa Zamboanga del Norte Police Provincial Office (PIU-ZNPPO), ubos sa pagdumala sa Force Commander.
Nasayran nga samtang nagpahigayon og routine inspection,naobserbahan sa mga operating personnel ang kadudahang lihok sa usa ka drayber sa cargo truck nga kalit nga mipaspas sa iyang pagpadagan sa sakyanan ug misulay sa paglikay sa checkpoint, nga miresulta sa mubo nga pagginukdanay hinungdan nga nasikop ang maong drayber.
Sa pag-inspeksyon sa sakyanan, nadiskobrehan ug nakumpiska sa mga awtoridad ang 105 ka kahon ug 230 ka ream sa lain-laing klase sa sigarilyo nga gitago sulod sa mga kahon sa pinaugang isda nga gibanabanang mobalor og PHP 6,280,080.00 base sa standard price index sa Bureau of Customs.
Ang suspek anaa karon sa kustodiya sa kapulisan ug mag-atubang og tukmang kaso sa paglapas sa Article 151 sa Revised Penal Code, Republic Act 10643 (Graphic Health Warnings Law), ug Republic Act 10863 (Customs Modernization and Tariff Act).(MEDALYN U. BORJA)
Source: 2ND PMFC, ZNPPO