Posibleng mosaka og ₱5 ang plete sa traysikel sa Dapitan City, apan wala pa kini maaprobahan samtang padayon pang gitimbang sa Sangguniang Panlungsod ang epekto niini sa mga drayber ug sa mga pasahero.
Gipahigayon niadtong Septiyembre 2 ang public hearing sa Bagting Covered Court, Barangay Bagting, aron makuha ang baruganan sa nagkalain-laing sektor bahin sa proposed fare increase.
Ang diskusyon nakasentro sa Committee Referral No. 257-2026, nga nagtinguha sa pag-amendar sa City Ordinance No. 2022-483, ilabina sa probisyon niini bahin sa plete ug freight sa mga motorized tricycle nga nag-operate sulod sa siyudad.
Alang sa mga tricycle driver ug operator, ang dugang nga ₱5 sa plete makatabang sa pagsagubang sa taas nga presyo sa gasolina ug sa uban pang gasto sa ilang adlaw-adlaw nga operasyon.
Apan alang sa mga pasahero, ang matag dugang sa pamasahe mahimong modugang sa ilang adlaw-adlaw nga gasto, ilabina sa mga estudyante, senior citizen, PWDs, ug mga mamumuo nga kanunay nagsakay og traysikel.
Gipangulohan ang konsultasyon nila City Councilor Jeneth N. Baje, chairperson sa Committee on Rules and Revision of Ordinances, ug Councilor John D. Empeynado, vice chairperson sa Committee on Public Utilities. Mitambong usab ang ubang miyembro sa Sangguniang Panlungsod.
Apil sa mga stakeholder nga mitambong ang mga tricycle driver ug operator, mga estudyante gikan sa Dapitan City High School ug Jose Rizal Memorial State University, ingon man mga representante sa Dapitan City Traffic Aide Unit, PWD sector, Office for Senior Citizens Affairs, PNP, DILG, ug nagkalain-laing city offices.
Gipahinumdoman usab sa mga opisyal ang mga tricycle driver nga likayan ang pagpanigarilyo samtang nagmaneho ug nagkarga og mga pasahero aron mapanalipdan ang kahimsog ug kaharuhay sa commuters.
Sa pagkakaron, wala pa’y pinal nga desisyon sa ₱5 nga fare increase.(IKEN B. GULLEM)
Source: Dapitan City Government