Gisugdan na sa Department of Science and Technology (DOST), Philippine Economic Zone Authority (PEZA), ug Jose Rizal Memorial State University (JRMSU) ang paghisgot sa posibilidad nga matukod sa rehiyon ang usa ka Knowledge, Innovation, Science and Technology (KIST) Park, nga posibleng ipahimutang sa JRMSU.
Pinaagi sa DOST Regional Office No. IX, DOST-Zamboanga del Norte, DOST Office of the Undersecretary for Regional Operations (OUSECRO), ug JRMSU, gihimo ang online orientation aron masabtan sa mga stakeholder ang konsepto, benepisyo, ug mga kinahanglanon sa pag-establisar sa KIST Park.
Ang KIST Park usa ka inisyatiba sa DOST ug PEZA nga nagtumong sa pagdugtong sa research, innovation, science and technology, ug industriya aron mapalambo ang mga teknolohiya ug mga negosyo nga nakabase sa teknolohiya.
Gipresentar ni Mr. Eman Biglete, S&T Fellow sa DOST-IVA, ang kinatibuk-ang konsepto sa KIST Park, lakip ang mga oportunidad niini alang sa mga unibersidad, researcher, innovator, ug mga negosyo. Naghatag usab og dugang nga kasayuran sila Engr. Melvin P. Jusi, Project Development Officer IV sa DOST-OUSECRO, ug Ms. Nancy Vargas sa PEZA atol sa open forum. Nagpahayag usab og interes ug suporta si JRMSU President Dr. Ma. Rio A. Naguit sa posibilidad nga mahimong host sa KIST Park ang unibersidad.
Sumala sa mga opisyal, ang research capabilities sa JRMSU, eksperyensiya sa faculty, mga pasilidad, ug mga kalihokan sa innovation mahimong mahimong lig-on nga pundasyon alang sa pagpalambo sa research ug technology-based enterprises sa Zamboanga del Norte ug sa tibuok Region IX.
Gihatagan usab og gibug-aton ni DOST-Zamboanga del Norte Provincial S&T Director Mr. Nuhman M. Aljani ang importansya sa sayong pakiglambigit sa mga stakeholder aron masiguro nga magkahiusa ang mga institusyon sa tumong ug direksiyon sa proyekto.
Ang maong orientation mao pa lamang ang unang lakang sa pagtan-aw sa posibilidad sa pag-establisar sa KIST Park sa Region IX, uban sa JRMSU isip usa sa mga potensyal nga mahimong sentro niini.(IKEN B. GULLEM)
Source: DOST Regional Office No. IX