Paspas na karon ug mas mapadali na ang paghatag og veterinary services ngadto sa mga mag-uuma ug livestock raisers human madawat sa Provincial Government of Zamboanga del Norte ang P4.62-milyon nga Mobile Veterinary Clinic ug Laboratory gikan sa Department of Agriculture.
Gipangunahan ni Gov. Darel Dexter T. Uy ang pagbendisyon sa maong mobile facility niadtong Hunyo 8, uban sa mga opisyal ug kawani sa probinsya.
Kini nga Mobile Veterinary Clinic ug Laboratory usa ka proyekto sa DA-Regional Field Office IX ilawom sa National Livestock Program. Gisangkapan aron magamit sa mga operasyon sa Office of the Provincial Veterinarian sa paghatag og mga serbisyo sa panglawas sa kahayopan.
Matud ni Provincial Veterinarian Dr. Sunday Dawn R. Bagatua, dako ang ikatabang sa maong mobile facility sa mga programa sama sa pagkapon, pagbakuna, pagtambal, ug ubang veterinary services nga direktang ihatod ngadto sa mga komunidad.
Gilauman usab nga makaabot kini bisan sa mga lagyong lungsod ug barangay aron mas daghang mag-uuma ug mananapong magbalantay ang maserbisyohan sa probinsya.(IKEN B. GULLEM)
Source: Zamboanga del Norte Provincial News Network