Dakong kalamboan sa serbisyong panglawas sa ikatulong distrito ang gipaabot sa umaabot nga pagtukod sa Liloy General Hospital human kini naaprobahan ubos sa Republic Act 12261 nga gipermahan ni Presidente Bongbong Marcos.
Gibutyag ni Congressman Adrian Amatong nga andam na ang proposed masterplan alang sa maong Level 2 hospital nga adunay 100-bed capacity. Sumala kaniya, nadawat na usab niya ang suwat gikan sa Department of Health nga nagpahibawo nga giandam na ang budgetary requirements alang sa General Appropriations Act (GAA) 2027 aron mapondohan ang konstruksyon, operasyon, ug maintenance sa maong ospital.
Ang kinatibuk-ang pondo alang sa proyekto mokabat sa PHP1.015 billion, diin PHP510 million ang ilaan alang sa infrastructure, PHP180 million alang sa kagamitan, PHP170 million alang sa personnel services, ug PHP155 million alang sa maintenance sulod sa usa ka tuig.
Gilauman usab nga makahatag kini ug daghang oportunidad sa trabaho alang sa mga residente sa Liloy ug tibuok ikatulong distrito, ilabina sa construction, medical services, nursing, utility, ug uban pang suporta sa operasyon sa ospital. Gituohan usab nga makapadasig kini sa lokal nga ekonomiya ug livelihood sa maong lugar.(IKEN B. GULLEM)
Source: RoNey PaCilan TV