Gidasig sa Sangguniang Kabataan (SK) ang mga Out-of-School Youth (OSY) nga ipadayon ang ilang edukasyon pinaagi sa Alternative Learning System (ALS) atol sa orientation nga gipahigayon sa Katipunan II Community Learning Center.
Personal nga mitambong si SK Chairman Hon. Charwin I. Veral uban ni Barangay Councilor ug Committee on Education Chairperson Hon. Herbert B. Centino ug ALS Teacher III Ricky E. Tabad aron makig-estorya sa mga enrolled learners.
Gipasabot sa orientation ang katuyoan sa ALS, ang iskedyul sa pagkat-on, ug ang proseso sa Accreditation and Equivalency (A&E) Test, nga naghatag og oportunidad sa mga OSY nga makakuha og diploma nga katumbas sa pormal nga edukasyon.
Gipahibalo usab sa SK ang mga programa ug tabang nga mahimong mahatag pinaagi sa Youth Development Fund aron masuportahan ang edukasyon sa mga kabatan-onan.
Sumala sa mga tigpasiugda sa programa, ang maong inisyatiba kabahin sa padayon nga paningkamot sa pag-abli og dugang oportunidad alang sa mga kabatan-onang wala makapadayon sa pormal nga pag-eskwela apan nagtinguha nga mahuman ang ilang edukasyon.(IKEN B. GULLEM)
Source: Sangguniang Kabataan San Vicente 7109