Gisugdan na ang pagtukod sa canteen sa Mindanao State University (MSU) Main Campus–Sindangan Extension School, usa ka proyekto nga gilauman makapauswag sa kahimtang sa pagkat-on ug kapakanan sa mga estudyante, magtutudlo ug mga kawani sa eskwelahan.
Kini nga proyekto donasyon sa League of Municipalities of the Philippines (LMP) ug gipatuman pinaagi sa panagtambayayong sa Local Government Unit (LGU) sa Sindangan.
Gilauman nga ang bag-ong canteen mahimong luwas, komportable ug dali maabot nga pasilidad diin makapangaon ug makapahulay ang mga estudyante atol sa ilang mga kalihokan sa eskwelahan.
Sumala sa LGU Sindangan, ang proyekto kabahin sa padayon nga paningkamot sa lokal nga panggamhanan ug mga institusyong pang-edukasyon aron mapalambo ang kalidad sa edukasyon pinaagi sa paghatag og mas maayong pasilidad sa kampus.
Nagpadayon ang konstruksyon sa maong proyekto isip kabahin sa misyon sa lungsod sa pagsuporta sa mga programa nga makatampo sa kalamboan sa kabatan-onan ug sa pag-andam kanila isip umaabot nga mga lider sa komunidad ug nasud.(IKEN B. GULLEM)
Source: Municipality of Sindangan