Milihok niadtong Agosto 22, 2026 ang mga personahe sa Philippine National Police (PNP) uban sa City Social Welfare and Development Office (CSWDO) ug Department of Education (DepEd) may kalabotan sa usa ka social media post nga adunay hulga batok sa Dapitan City National High School.
Nasuta sa mga awtoridad ang usa ka 16-anyos nga menor de edad nga giingong nalambigit sa dummy Facebook account nga gigamit sa pag-post sa hulga. Ang maong post adunay mga litrato sa pusil, mga magazine, ug bala.
Ang menor de edad, uban sa iyang ginikanan, gitugyan ngadto sa CSWDO alang sa angay nga intervention ug diversion proceedings, subay sa mga balaod ug proseso nga magamit sa maong kaso.
Gipasalig sa Dapitan City Crisis Management Committee ang publiko nga padayon ang koordinasyon sa mga concerned agencies ug gipatuman ang angay nga mga lakang alang sa seguridad sa komunidad.
Gipahinumdoman usab ang tanan nga dili ipadayag ang identidad sa menor de edad, dili magpakaylap og mga impormasyon nga wala pa mapamatud-i, ug dili na usab ipasa o ipakalat ang maong threatening post.
Giawhag ang publiko nga magpabiling kalmado ug alerto, ug mosalig lamang sa mga impormasyon nga opisyal ug beripikado gikan sa mga awtoridad.(IKEN B. GULLEM)
Source: Dapitan City Government