Mikortesiya si Office of Civil Defense (OCD) Region IX Regional Director Atty. Ruel S. Halanes kang Mayor Evelyn “Belen” T. Uy niadtong Hunyo 4, 2026, didto sa buhatan sa City Mayor aron hisgutan ang dugang nga panagtambayayong sa pagpalig-on sa kahandam batok sa mga katalagman ug emerhensya.
Gitambongan usab ang maong panagtagbo ni City Disaster Risk Reduction and Management Officer Engr. Nelson Quimiging diin gihisgutan ang mga estratehikong plano nga makatabang sa pagpalambo sa disaster risk reduction programs, pagdumala sa mga kahimanan, ug episyenteng koordinasyon panahon sa mga emerhensya.
Gipasiugda sa mga opisyal ang importansya sa lig-on nga pakigtambayayong tali sa nasyonal ug lokal nga ahensya aron maseguro ang mas organisado ug paspas nga pagtubag sa bisan unsang kalamidad nga mahimong moabot sa dakbayan.
Gipamatud-an sa Kagamhanang Lokal sa Dapitan ug OCD Region IX ang ilang padayong kooperasyon isip kabahin sa tinguha nga makahimo og mas luwas, andam, ug lig-on nga komunidad alang sa tanang Dapitanon.(JENIFFER JR. DELICA)
Source: City Information Division- Dapitan City