Gipatikan ang mas hugot nga pagmonitor sa presyo sa fuel ug Liquefied Petroleum Gas (LPG) sa Dakbayan sa Dipolog human gipirmahan ni City Mayor Roberto Y. Uy ang Executive Order No. 29, Series of 2026 nga nagmugna sa Composite Monitoring Team on Fuel and LPG Prices ubos sa Local Price Coordinating Council (LPCC).
Ang maong team maoy motutok sa regular nga inspeksyon sa mga gasolinahan ug LPG dealers aron masiguro nga nagsunod kini sa mga balaod, lagda, ug opisyal nga price advisories sa gobyerno. Lakip usab sa ilang buluhaton ang pagberipika ug pagdokumento sa presyo sa mga produktong petrolyo ug LPG, ingon man ang paghimog rekomendasyon nga isumite sa City Mayor ug LPCC.
Sumala sa City Government, ang pagmugna sa monitoring team kabahin sa paningkamot sa lokal nga kagamhanan sa pagpanalipod sa interes sa mga konsumante ug pagpalig-on sa transparency sa merkado pinaagi sa pagsiguro nga patas ug makatarunganon ang presyo sa fuel ug LPG sa siyudad.
Gihangyo usab sa lokal nga kagamhanan ang publiko nga magpabiling mabinantayon ug dayong motaho sa mga otoridad kon adunay makita o masinati nga dili makatarunganong pagpresyo sa fuel ug LPG aron mapadayon ang pagpanalipod sa katungod sa mga konsumante.(IKEN B. GULLEM)
Source: Dipolog City Government