Mapalig-on ang fire safety, disaster preparedness, ug emergency response maoy tumong sa Memorandum of Agreement (MOA) nga gipirmahan sa City Government of Dipolog ug Bureau of Fire Protection (BFP) Region IX niadtong Hulyo 30 sa City Mayor’s Office.
Gipirmahan ang kasabutan nila Dipolog City Mayor Roberto Y. Uy ug BFP Region IX Regional Fire Marshal Fire Senior Superintendent Kadil T. Acalul isip pagpalig-on sa panagtambayayong sa lokal nga kagamhanan ug sa BFP sa pagpatuman sa mga programa alang sa kaluwasan sa publiko.
Pinaagi sa MOA, gilauman nga mas mapalambo ang koordinasyon sa duha ka ahensya sa pagpatuman sa mga inisyatibo nga nagpunting sa pagpugong sa sunog, pag-andam sa mga komunidad batok sa mga kalamidad, ug pagpalig-on sa emergency response services.
Kabahin usab sa pagpirma sa kasabutan ang pagpasalig sa City Government of Dipolog ug BFP Region IX sa padayon nga panagtinabangay aron masiguro ang epektibo ug paspas nga paghatag og serbisyo sa panahon sa mga emerhensya.
Misitigo sa maong pagpirma sila Zamboanga del Norte Provincial Fire Marshal Fire Superintendent Richard C. Timosa ug Dapitan City Fire Marshal Fire Inspector Rommel M. Rojas.(IKEN B. GULLEM)
Source: Dipolog City Government