Aron mapalig-on ang koordinasyon ug pagtutok sa mga programa alang sa kabataan, ang mga miymebro sa Provincial Council for the Protection of Children (PCPC) nagkatigom alang sa ikatulong quarterly meeting nga gipahigayon sa Zamboanga del Norte Convention and Exhibition Center, Plenary Hall Dipolog City, kaniadtong Oktubre 20, 2025.
Ang panagtigom gipangunahan ni Governor Darel Dexter T. Uy, PCPC Chairperson, Board Member Kay Marie Bolando, PCPC Vice-Chairperson, Head Secretariat Hannah Lou Mandantes, ug mga representante gikan sa DILG, DepEd, PNP, ug ubang mga opisina sa probinsyal nga pangagamhanan.
Lakip sa mga gihisgutan sa miting mao ang pag-reorganisa sa mga miyembro sa konseho, aron mapauswag pa ang koordinasyon ug implementasyon sa mga programa para sa kabataan. Gipresentar usab ang 2024 Provincial Children’s Situation Report, nga naglangkob sa health ug nutrition data, enrollment sa Early Childhood Development (ECD) programs, ug impormasyon kabahin sa Children in Need of Special Protection (CNSP) ug Children in Conflict with the Law (CICL).
Base sa report, gilaraw ang mga interbensyon batok sa malnutrisyon ilabi na sa “Triple SB” areas, ug mga programa alang sa kabataan nga anaa sa panganib sama sa CNSP ug CICL. Gisugutan usab ang plano sa pagtaas sa honorarium sa mga Barangay Health Workers (BHW), Barangay Nutrition Scholars (BNS), ug Early Child Development (ECD) workers sa mga munisipalidad ug lungsod nga nakapasar sa Child-Friendly Local Governance Audit (CFLGA).
Ang maong miting nagpamatood sa padayon nga paningkamot sa PCPC ubos sa liderato ni Governor Uy sa pagpanalipod ug pagpalambo sa kabataan, pinaagi sa panaghiusa sa mga ahensya ug lokal nga liderato sa Zamboanga del Norte.(Iken B. Gullem)
Photo courtesy: Zamboanga del Norte Provincial News Network