Gisugdan na gahapong adlawa Enero 1, 2026 ang bag-ong minimum wage increase sa Zamboanga Peninsula Region sumala sa Wage Order No. RIX-24.
Kini nga pagtaas sa suweldo gitumong aron matabangan ang mga manggagawa sa pag-atubang sa nagkataas nga presyo sa palaliton ug panginahanglanon sa adlaw-adlaw.
Sumala sa wage order, ang minimum wage para sa non-agricultural establishments lakip na ang retail ug service establishments nga adunay 10 o labaw pang trabahante, gitakda na sa ₱439 kada adlaw. Gilauman nga kini makahatag og dugang nga suporta sa mga empleyado sa pribadong sektor ug makapaayo sa ilang kahimtangan sa panginabuhi.
Samtang, ang agricultural establishments, apil ang retail ug service establishments nga adunay 1 hangtod 9 ka trabahante, adunay bag-ong minimum wage nga ₱426 kada adlaw.
Gidasig ang mga employers sa rehiyon nga mosunod sa maong wage order aron masiguro ang hustong suweldo ug patas nga pagtratar sa mga manggagawa.(IKEN B. GULLEM)
Source: Department of Labor and Employment- DOLE