Duha ka mga personahe sa Cultural Center of the Philippines (CCP) naabot sa Dapitan para ipahigayon ang unang hugna sa Film Appreciation Workshop atol sa CINEMALAYA 18 in Dapitan: Festival of Winners kaniadtong Miyerkules, Agosto 31 didto sa Dapitan City Cultural and Sports Center sakop sa Dakbayan sa Dapitan.
Sila ni Direk Elvert Bañares, usa ka film director, producer, multidisciplinary artist, film festival programmer ug educator, ug si Direk Lino Matalang, Jr., usa pud ka Video Director for Stage ug International Documentaries ug ang kasamtangang sakop sa Arts Education Department sa CCP, ang mga Resource Speakers sa maong workshop.
Modul-an sa 300 ka mga partisipante ang mitambong sa tulo ka oras nga workshop kabahin sa film appreciation nga nagagikan sa nagkalainlaing tulunghaan sa dakbayan sa Dapitan ingon man sa mga Dapitanong interesado kabahin sa pagbuhat ug pelikula.
Matud pa ni Atty. Ivan Patrick Ang, ang Chairman sa ZaNorte Provincial Tourism Council ug Program Director sa gipahigayong workshop, nga si Direk Bañares nakapasundayag na sa iyang mga nahimong pelikula sa unom ka mga kontinente ug nakapartisipar sa mokapin sa usa ka gatus ka mga film festivals nga gipahigayon sa kapin sa 35 ka mga nasud sa tibook kalibutan.
Gawas niini, si Direk Bañares usa sa duha ka higayon nga nahimong meyembro sa National Executive Committee on Cinema sa National Commission for Culture and the Arts (NCCA) ug kasamtangang Festival Director sa Sine Halaga Film Festival.
Gipahibawo usab ni Atty. Ang nga ang tanang mipartisipar sa maong workshop hatagan og libreng tiket para sa screening sa mga pelikula nga midaug sa Cinemalaya Film Festival 2022 nga ipasundayag sa Teatro de Dapitan sulod sa Glorious Fantasyland Complex.
Samtang ang usa ka grupo sa teatro sa Jose Rizal Memorial State University nga gipanganlang Teyatro Dasuliman nagpasalamat og dako sa kagamhanang lokal sa Dapitan uban sa kagamhanang probinsiyal sa Zamboanga del Norte nga maoy naningkamot nga mapahigayon ang nasangpit nga Film Appreciation Workshop kay kini makatabang kanila nga mga local artists diha na sa pagpalambo ug dugang sa ilang mga paningkamot.
Si Claire Guantero, ang Executive President sa Teyatro Dasuliman, nagkanayon nga daghan sa ilang mga meyembro ang interesado makat-on kabahin na sa film making.
Gawas sa Dapitan, gipahigayon pud ang ikaduhang hugna sa workshop kagahong adlawa sa Lungsod sa Sindangan ug sa Lungsod sa Salug. Karong adlawa, ang panapos na hugna, anaa sa Dakbayan sa Dipolog.
Una nang gipamahayag ni Dapitan City Mayor Seth Frederick Jalosjos nga pakusgan niya ang turismo sa Dakbayan sa Dapitan dili lang kay agi sa kasaysayan kon dili kabahin sab sa kultura, sa arts, ug sa isports.
(Source: Dapitan City Information Division Facebook page)
