Nangrugin ti gobierno probinsial babaen iti Metro Ilocos Norte Council wenno MINC a nangipaay ti insurance kadagiti nainaig iti aksidente a kameng ti Tricycle Operators and Drivers Association wenno TODA ken iti Jeepney Operators and Drivers Association wenno JODA.
Segun ken ni Atty. Nikki Pilar, mangidadaulo ti MINC, ti nasao nga insurance ti inkari ni Gob. Matthew J. Marcos Manotoc kabayatan ti panagsursorna itay kallabes.
Imbatadna a maysa kadagitoy ti death insurance a naipaayan ti limapulo ribu a pisos ken dua ti “accident insurance” a naipaayan met ti sagtatallopulo ribu a pisos.
Inlawlawagna a maysa kadagiti naaksidente ti nagpasar ti “brain injury” a taga siudad ti Laoag rason a ti kabsatna ti immawat ti insurance a para kenkuana idinto a ti maysa a nagpasar ti “spinal injury” a taga Banna ket ti asawana ti immawat iti insurance a para kenkuana.
Impalgak ni Pilar nga agpada a nakana ti nagpasaran dagiti benepisiario ti “accident insurance” nga agingga ita ket saanda pay a kabaelan ti agpasada.
Nupay kasta, kunana a basar iti MINC accident group insurance fund, maminsan laeng a maipaayan ti tulong dagiti benepisiario.
Iti baet daytoy, kunana a mabalin nga iti masungad a tawen ket agtultuloy a maipaayanton ti tulong dagiti kameng ti Jeepney Operators and Drivers Association wenno JODA ken dagiti kameng ti Tricycle Operators and Drivers Association wenno TODA a nakana ti nagpasaranda iti pannakaaksidenteda a kas iti kalikagum ti gobernador.
Kunana a daytoy ket ti pannakaipaay ti medical assistance a sabali manen a proyekto ti MINC nga inaprobaran ni Gob. Marcos Manotoc
Kabayatanna, inpakaammo ni Pilar nga iti agdama ket adda dagiti nakapending nga maipaayan iti sabali pay a tulong babaen iti insurance a mannarimaan a maipagpagna dagiti kasapulan a dokumento. (Cita Macalipis)
(Source: Provincial Government of Ilocos Norte)