Nakabaton og medikal ug uban pang matang sa tabang ang mga lumulupyo gikan sa nagkalain-laing bahin sa Unang Distrito sa Zamboanga del Norte atol sa People’s Day nga gipahigayon ni Congressman Roberto “Pinpin” T. Uy Jr..
Gitambongan ang kalihokan sa mga pasyente, senior citizens, ginikanan ug ubang mga residente nga personal nga mipadayag sa ilang mga kabalaka, ilabina ang may kalabotan sa panglawas ug sa gasto sa pagtambal. Imbis nga pinaagi lamang sa mga dokumento, gipaminaw mismo sa kongresista ang matag hangyo ug sitwasyon sa mga nangayo og tabang.
Matud pa ni Uy, ang pag-alagad sa katawhan dili angay ibase sa politika kondili sa panginahanglan sa matag usa. Gipasabot usab niya nga ang serbisyo publiko nagpasabot sa pag-abot sa mga tawo sa panahon nga labing nanginahanglan sila og tabang.
Gawas sa paghatag og medikal nga tabang ug uban pang suporta, gipahinumdoman usab ni Congressman Uy ang mga benepisyaryo nga ang tanang panalangin nagagikan sa Ginoo, ug ang tinuod nga serbisyo publiko nagsugod sa pagpaminaw, pagpakabana, ug pagtabang sa isigkatawo.(JENIFFER JR. DELICA)
Source: Zamboanga del Norte Provincial News Network