Nagtagbo ang mga rescue team gikan sa nagkalain-laing barangay sa Katipunan aron magsukod sa ilang kahibalo, kahanas, ug koordinasyon atol sa Barangay Rescuelympics 2026 nga gipahigayon sa Municipal Plaza niadtong Hulyo 28 isip kabahin sa pagsaulog sa National Disaster Resilience Month.
Gipangulohan sa Municipal Disaster Risk Reduction and Management Office uban sa Municipal Local Government Operations Office ang maong kalihokan, diin giatubang sa mga partisipante ang nagkalain-laing rescue ug emergency response challenges aron masukod ang ilang kaandam sa panahon sa kalamidad ug emerhensiya.
Gawas sa kompetisyon, gitumong usab sa Rescuelympics ang pagpalig-on sa teamwork, disiplina, ug koordinasyon sa mga barangay responders aron mas epektibo ang ilang pagtubag sa mga emerhensiya.
Gipasalamatan sa Lokal nga Panggamhanan sa Katipunan ang tanang barangay, partner agencies, ug mga organisador nga miapil sa kalihokan, nga kabahin sa padayon nga paningkamot sa pagpalig-on sa kahandam ug kaluwasan sa komunidad.(JENIFFER JR. DELICA)
Source: BFP R9 Katipunan