Nakahatag og libreng serbisyong medikal ang Zamboanga del Norte Medical Center sa Dipolog City ngadto sa mga kabataan pinaagi sa Saturday Medical Mission nga gipahigayon niadtong Mayo 2, 2026.
Gipangunahan sa mga doktor nga sila Noel Astrologo ug Marloune Amboang, uban sa medical team, ang pag-atiman sa mga pasyente diin walo ang na-check-up, lima ang gi-evaluate alang sa operasyon, ug tulo ang gi-refer sa Cebu alang sa dugang nga pagtambal.
Dungan usab nga gipahigayon ang libre nga operasyon diin tulo ka malampusong surgical procedures ang nahimo, lakip ang usa ka excision sa anterior abdominal mass ug duha ka herniotomy.
Sumala sa ospital, napahigayon ang maong kalihokan uban sa suporta ni Governor Darel Uy ug sa paningkamot sa mga staff sa ZNMC ubos sa liderato ni Hospital Administrator Dr. Esmeralda Nadela, nga nagtumong sa paghatag og mas duol ug kalidad nga serbisyong panglawas sa katawhan.(JENIFFER JR. DELICA)
Source: Zamboanga del Norte Medical Team