Sa kinaunahang higayon, nagkatigom sa usa ka Media Forum 2026 ang nagkadaiyang media practitioners gikan sa Dakbayan sa Dipolog ug Dapitan nga gipahigayon sa Hall 3, 2nd Floor sa Zamboanga del Norte Capitol alas 2:00 sa hapon karong adlawa, Hunyo 3, 2026.
Tumong sa maong forum ang pagpalig-on sa kolaborasyon tali sa Provincial Health Office ug sa media partners pinaagi sa paghatag og mga update, programa, ug mga inisyatibo nga may kalabutan sa kahimsog sa publiko. Gipasiugda usab niini ang kamahinungdanon sa bukas ug responsableng komunikasyon aron mas epektibong maabot sa komunidad ang tukmang impormasyon.
Usa sa sentro sa diskusyon mao ang Disease Situational Report as of May 28, 2026 nga gipresentar ni Mr. Karlo C. Rhudy, Disease Surveillance Officer sa Provincial DOH Office. Gipadayag niini ang kahimtang sa nagkadaiyang sakit sa lalawigan ilabina ang dengue nga adunay 334 reported cases ug 33 ka kompirmadong kaso. Nanguna sa adunay taas nga ihap sa kaso ang lungsod sa Siocon nga adunay 14 ka kaso, gisundan sa Labason nga adunay 4 ug Sibuco nga adunay 3.
Nahisgutan usab ang Influenza-like Illness nga adunay 328 ka reported cases, Acute Bloody Diarrhea nga adunay 20 ka confirmed cases diin ang lungsod sa Manukan maoy adunay pinakadaghang natala, ug Measles Rubella nga adunay 19 ka kaso, lakip pa ang ubang sakit nga padayon nga ginamonitor sa Provincial Health Office.
Kabahin usab sa forum ang presentasyon bahin sa Non-Communicable Diseases ug Smoking Updates nga gipangulohan nila Ms. Charlin D. Montilla ug Ms. Kersty A. Celemin, PHO NCD Coordinators. Sentro sa ilang presentasyon ang Tuberculosis diin matud pa, as of 2025, adunay 2,557 ka kaso sa Tuberculosis nga natala sa Zamboanga del Norte.
Sa iyang Opening Remarks, gipasiugda ni Dr. Benson Panaguiton, OIC Provincial Health Officer, ang dakong papel sa media sa pagpakaylap sa tukmang impormasyon ilabina sa mga isyung panglawas aron mas mapalambo ang kahibalo ug pagpanalipod sa katawhan batok sa mga sakit.
Samtang, matud pa ni Gloria G. Oracoy sa iyang closing remarks gipasiugda niini nga dili lamang story tellers ang mga media practitioners kondili usa dapat sa mo combat sa misinformation, magpaisugda sa health messages alang sa tanang household sa probinsya sa Zamboanga del Norte.
Dugang pa, gibutyag niini nga magpadayon ang maayong kolaborasyon tali media ug partner agencies aron pinaagi sa responsableng pagbalita ug bukas nga komunikasyon, mas mapalig-on pa ang kahibalo sa katawhan bahin sa kahimsog ug kaluwasan sa komunidad.
Nakahigayon usab ang mga media practitioners sa pagpangutana ug paghatag og suhestiyon kalabot sa mga presentasyong gihisgutan atol sa forum, nga nagpakita sa aktibong partisipasyon ug panaghiusa alang sa mas lig-on nga public health information campaign sa lalawigan.
News and photo by: IKEN GULLEM