Opisyal nga gisugdan sa Dakbayan sa Dipolog ang Measles-Rubella Supplemental Immunization Activity (MR-SIA), pipangunahan sa Department of Health (DOH) Zamboanga Peninsula, uban sa pakigtambayayong sa World Health Organization (WHO) ug sa suporta sa probinsyal ug lokal nga kagamhanan, nga gipahigayon sa D’ Food Hub and Events Center, Brgy. Miputak.
Magpadayon gikan Enero 19 hangtod Pebrero 13, 2026 ang maong aktibidad, ug maghatag og libre ug luwas nga bakuna kontra tigdas ug rubella sa mga kabataan nga nag-edad 6 hangtud 59 ka bulan sa tibuok Zamboanga del Norte, aron malikayan ang pagkatap sa maong mga sakit.
Gipangunahan ang kalihukan ni DOH-ZPCHD OIC Regional Director Dr. Lenny Joy Johnson-Rivera, uban si Engr. Domingo Lusayan, WHO Consultant Dr. Namrata Bhatta, ug uban pang opisyal. Mitambong usab ang mga representante nila Gov. Darel Dexter T. Uy ug City Mayor Roberto Y. Uy, lakip ang mga health workers ug volunteers.
Gipahigayon usab ang orientation ug seremonyal nga pagbakuna isip pormal nga pagsugod sa kampanya. Sa ilang mensahe, gi-awhag sa mga lider ang ginikanan nga pahimuslan ang programa isip dakong lakang sa pagpanalipod sa kahimsog sa mga kabataan ug sa komunidad.(IKEN B. GULLEM)
Source: Dipolog City Government