Personal nga nakigtagbo sa mga Senador ning Nasud, ang Mayor sa Dapitan, diin kini gilangkuban, nila ni Senador Bam Aquino, Senador Tito Sotto, Senador Risa Hontiveros, ug ni Senador Erwin Tulfo, aron personal niining ma-ipadayag ngadto kanila, ang mga panginahanglan ug plano sa Syudad nga iyang gipangunahan, niadtong nakalabay’ng adlaw, Setyembre 16, 2025.
Matud pa, nga ang nasangpit nga pagpakigtagbo sa Mayor ngadto sa mga Senador, usa ka dakong dungog sa Dapitan, ug usa ka klaro nga timaan sa seryoso nga tinguha ni Mayor Evelyn T. Uy, nga makahatag ug Suporta, Pondo, ug Proyekto nga makapalambo sa Infrastruktura, Ekonomiya, Edukasyon, ug uban pa, sulod sa naasoy nga dakbayan. lakip sa mga gipunting nga plano niini, mao ang pagpalambo sa mga pasilidad nga mopukaw sa kalihokan nga pang-ekonomiya ug ang paghatag ug mas maayong kaugmaon alang sa mga kabataan.
Sa pahayag nga giluwatan ni Mayor Uy, matud pa nga kini dili lang personal nga dungog kundili usa ka oportunidad para sa Dapitan, diin iyang gidala ang tingog sa katawhan, alang sa ilang mga panginahanglan, ug ang mga damgo nga mahimong mas lig-on ug mauswagon ang mao nilang dakbayan, ug siya nagpasalamat sa mainiton nga pagdawat ug suporta kaniya, sa mga senador, nga iyang nahinabi.
Bisan paman sa unang mga Bulan palang sa iyang paglingkod isip Mayor sa Dapitan, nakita na niini ang Determinasyon ug Kakugi sa maong Mayor, aron nga mapalapdan ang Suporta sa Nasyonal nga Liderato, ug masiguro nga matag Proyekto ug Programa, makahatag gyud ug kaayohan sa katawhan, nga matud pa, ang iyang paningkamot naghatag ug bag-ong paglaum sa mga Dapitanon, nga ang dakbayan Molambo, ug Mauswagon pinaagi sa matinud-anong pagdumala.(Julius Esmade)