Mipa-abot sa iyang kinasing-kasing ug mainitong pahalipay si City Mayor Darel Dexter T. Uy ngadto sa tanang mga bag-o o subling napili nga mga opiyales sa barangay sa milabay nga Barangay ug Sangguniang Kabataan Election, nga gipahigayon kagahapong adlawa, Oktubre 30, 2023.
Ang pagpahalipay ni Mayor Uy ang iyang gihimo isip pag-ila sa mga paningkamot nga gihimo sa isig mga kandidato alang sa ilang kadaugan sa malinawong paagi.
Dako nga gikalipay sa Mayor nga nahimong “Generally Peaceful” ang pagpahigayon sa piniliay sa Barangay ug Sangguniang Kabataan Election dinhi sa 21 ka barangay ning atong siyudad, nga wala ra’y dili maayong panghitabo sama sa ubang dapit dinhi sa atong nasud.
Subay ning maong maayong kalamboan, gihagit karon ni Mayor Uy ang tanang mga midaug (bag-o o nasubli-an), sa paghimo sa ilang tahas ug responsibilidad nga gisangon kanila sa ilang mga katungdanan isip mga “Public Servants”.
Dugang pa niini, nga unta, ang mga bag-ong hut-ong karon sa mga barangay opisyales ang mohimo gayud sa ilang tinud-anay nga kaakohan ngadto sa mga katawhan, pinaagi sa paghatag sa sinsero nga panerbisyo, ug labaw sa tanan, proyekto alang sa kalamboan sa ilang matag barangay, basi sa laing kaugalingong pangandoy, tinguha ug gipanum-paang kaakohan.
(Source: Dipolog City Government Facebook page)