Gipangulohan ni Mayor Evelyn “Belen” T. Uy ang konsultasyon kabahin sa gitanyag nga sustainable barbeque station ug food hub nga ipahimutang sa Barangay Bagting, tapad sa Dapitan City Children’s Park, isip lakang sa pagpalig-on sa City Economic Enterprise ug food tourism sa Dapitan City.
Gihimo ang miting niadtong Enero 6, 2026 sa City Mayor’s Office Conference Room, uban ang mga opisyal sa lokal nga kagamhanan ug Department of Labor and Employment Zamboanga del Norte. Gitambongan kini nila Aileen B. Mondijar, Chief Labor and Employment Officer, ug Nathalie D. Albino, Senior Labor and Employment Officer, nga nagtino sa suporta sa DOLE lakip ang materyales ug teknikal nga giya alang sa mga vendor.
Ang gitumong nga barbeque station ug food hub maghatag og organisado ug luwas nga lugar alang sa mga local food vendor samtang magmugna og dugayng oportunidad panginabuhian. Gipasabot ni Mayor Belen nga ang proyekto nagpakita sa paningkamot sa City Government sa malungtarong pang-ekonomiyang programa nga motukod sa lokal nga negosyo ug mopalig-on sa Dapitan isip nagatubong nga destinasyon sa pagkaon ug turismo.(JENIFFER JR. DELICA)
Photo Courtesy: City Government of Dapitan