Gibutyag sa pinakabag-ong Boses ng Bayan Index of Governance (IOG) survey sa RPMD Foundation Inc. nga sila Dapitan City Mayor Belen Uy ug Dipolog City Mayor Berto Uy maoy lakip sa mga labing taas og performance isip lokal nga ehekutibo sa Zamboanga Peninsula.
Sa resulta sa survey nga gipahigayon niadtong Abril 1 hangtod 8, 2026, nakakuha si Mayor Belen Uy og 83.2 porsyento nga iskor ug nakigtabla sa unang pwesto, samtang si Mayor Berto Uy nakarekord og 81.0 porsyento ug nakigtabla sa ikaduhang pwesto sa rehiyon.
Ang survey, nga gitambongan sa 5,000 ka rehistradong botante, nagsusi sa kahusayan sa mga lokal nga opisyal sa aspeto sa paghatag og batakang serbisyo, pagpatuman sa mga proyekto sa imprastruktura, transparency sa pangagamhanan, ug pagtubag sa panginahanglan sa katawhan.
Matud pa sa RPMD Foundation Inc., ang taas nga rating sa duha ka mayor nagpakita sa lig-on nga pagsalig sa publiko sa ilang estilo sa pagpangulo ug sa mga programa nga ilang gipatuman alang sa kalamboan sa ilang mga siyudad.(IKEN B. GULLEM)
Source: Zamboanga del Norte Provincial News Network